ຄວາມຮູ້ບໍ່ມີມື້ຕາຍ

ບົດກອນ ຜະຫຍາ ບຸນ ການທຳບຸນ

ຄັນຊິຄອຍແຕ່ບຸນມາຄໍ້າ ຄັນບໍ່ທຳກະບໍ່ແມ່ນ

ຄອຍແຕ່ບຸນສົ່ງໃຫ້ ມັນຊິໄດ້ຢູ່ບ່ອນໃດ

ຄືຈັ່ງເຮົາມີອາຫານໄວ້ ຄັນບໍ່ກິນມັນບໍ່ອີ່ມ

ມີລາບຄັນບໍ່ເອົາເຂົ້າຄຸ້ຍ ທາງທ້ອງບໍ່ຫ່ອນເຕັມ ຫຼານເອີຍ

ຊື່ວ່າໂລກີກວ້າງ ເມືອງຄົນມັນບໍ່ທ່ຽງ

ມັນຫາກຫງ່ຽງຊ້ອຍງ້ອຍ ຄືຄ້ອຍຕະລິ່ງຂອງ

ລາງເທື່ອລູກສິດໄດ້ ເປັນຄູສອນສັ່ງ

ລາງເທື່ອລູກອອກກົ້ນ ສອນສໍ້ພໍ່ແມ່ຄີງ

ລາງເທື່ອແນວເດັກນ້ອຍ ສອນຄົນຫົວດ່ອນ

ລາງເທື່ອລູກໄພ່ບ້ານ ສອນທ້າວບ່າວພະຍາ ແນວນັ້ນໄດ໊

ອິດອ່ອນແຮງເມື່ອຍລ້າ ຈາກວຽກໄຮ່ງານສວນ

ຫວນຄືນຕ່າວເມືອເຮືອນ ປວດເມື່ອຍຕາມກາຍເນື້ອ

ປູເສື່ອຕາກແດດໄວ້ ຕົບຝຸ່ນໃຫ້ໄຫງ່ຫ່າງ

ຫອມບໍ່ຈາງກິ່ນແດດກ້າ ສຸກກາຍເດ້ເມື່ອໄດ້ນອນລົງ

ໂລກາພິວັດ

ງົວບໍ່ພໍໃຈນ້ຳ ສິຫາກີນນ້ຳມັນເຄື່ອງ

ເຂົ້າສິເກີດຢູ່ເມືອງ ມີແຕ່ເມັດໂຈ່ໂກ້ ໃບເຫງົ້າຫາກບໍ່ມີ

ທຸກມື້ນີ້ ນ້ອງພີ່ຜິດໃຈກັນ

ວັນເດືອນປີ ສິຕ່າວກາຍແປປີ້ນ

ຫີນສິລອຍເໜືອນ້ຳ ຄົນເລວຊາມສິເປັນໃຫຍ່

ໄຟສິໄໝ້ຮອດນ້ຳ ໃນຫ້ວຍຮ່ອມໜອງ

ຂຽດຈະນາສິຂື້ນຮ້ອງ ຫາຄູ່ຢູ່ປາຍແສງ

ປາຄະແຍງສິຂື້ນແປງຮວງຮັງ ຢູ່ເທິງປາຍຄໍ້

ຄົນສໍພໍສິໄດ້ເປັນຫົວຫນ້າ ເສນາອຳໝາດ

ພວກນັກປາດ ສິໄດ້ຕົກຕ່ຳຕ້ອຍ

ລີງນ້ອຍ ກະບໍ່ປານ

ປານໄກ່ປ່າ ມາຢາກເປັນໄກ່ບ້ານ

ພາກັນອ່ານທາງຜິດ ເສດຖະກິດສະໄໝເງິນໃບຊາວຄ່າບໍ່ມີພໍດີ້

ພູເຂົາຫີນ ຫຼຽວບໍ່ເຫັນກົກໄມ້

ໂລກສິເກີດເປັນໄຟ ລາມໄໝ້ໄປຈົນທົ່ວ

ຍ້ອນໃຈຄົນຫຍາບຊົ່ວ ຕົວະຕົ້ມຕັ້ງແຕ່ກັນ

ພຸດທະອົງບອກບັ້ນ ອາຍຸຂອງຄົນ

ສາລະວົນກັນເອງ ສິຂົ່ມເຫັງຄົນນ້ອຍ

ໃຜເປັນຫອຍເປັນກຸ້ງ ພຸງບາງສິຕາຍກ່ອນ

ໃຜພຸງໜາສິຖືກຄ້ອນ ຕາຍຖິ້ມບາດເທື່ອລຸນ

ໂລກສິເກີດວ່າວຸ້ນ ກັບຕ່າວຕາລະບັດ

ບໍ່ແມ່ນຍາມລົມພັດ ຫ່າລົມພັດເຊຕ້ອງ

ບໍ່ແມ່ນຄອງຝົນຟ້າ ສາຍຝົນພັດເລັ້ງລັ່ງ

ບໍ່ແມ່ນຍາມແຫ້ງແລ້ງ ດິນນັ້ນກະເລົ່າແຫງ

ຮອດຍາມຝົນກະແຫ້ງແລ້ງ ດິນຫາກໄຫງ່ເປັນຜົງ

ຝົນມາຫຼົງທາງທຽວ ໄດ້ກ່ຽວເອົາຢູ່ໃນນ້ຳ

ເຖິງເມື່ອຍາມຫຼົກກ້າ ດຳນາເຂົ້າກ້າຫ່ຽວ

ບາດເມື່ອເຖິງຍາມກ່ຽວ ຝູງໝູ່ກົບຂຽດຮ້ອງ ຝົນເທັ້ງພັດເລ່ັງລົງ.

ການເຮັດບຸນຂອງພັນລະຍາມາຄະມານົບ

ນາງສຸທັມມານ້ອງ ທຳບຸນໂກ້ສະຫງ່າ

ອານິສົງຊໍ່ຟ້າ ໄດ້ນຳຍູ້ສົງເຖິງ

ບຸນຫາກສູງບໍ່ເນີ້ງ ຄ້ອຍງ່ຽງຕາມໂຕ

ເຮັດໃຫ້ນາງພານພົບ ຢູ່ໃນເມືອງຟ້າ

ຝ່າຍສຸນັນທານ້ອງ ຂຸດສະອັນກວ້າງໃຫຽ່

ຫວັງໃຫ້ຄົນອື່ນໄດ້ ສະລ້າງສ່ວຍສົງ

ບຸນປະສົງໝັ້ນ ຄືກກັນກັບພີ່

ເຮັດໃຫ້ນ້າງນ້ອງນີ້ ເນົາຢັ້ງຢູ່ສະຫວັນ

ສຸຈິດຕານ້ອງນັ້ນ ມຸ່ງໃສ່ທາງສວນ

ມວນປະການສອນ ໝູ່ພະມອນບິນຕອມ

ພົງພະຍອມຊື່ືນ ມັນປາເຫຼືອງອະລ່າມ

ພວງມະລິສອດ ຫອມກົ້ວເຂົ້າກັນ

ອານິສົງຕັ້ງແຕ່ນັ້ນ ຍູ້ສົ່ງຕາມໂຕ

ເຖິງເມືອງແມນ ໝູ່ເທພາລ້ອມ

ໃຫ້ຄອຍຊອມດູໜ້າ ສູຊາດາຜູ້ປະໝາດ

ຄາແຕ່ຕົກແຕ່ງເອ້ ເຍືອງໜ້າສ່ອງແຕ່ເງົາ

ເລີ່ມແຕ່ເຊົ້າ ຮອດບ່າຍອັດສະດົງ

ຄາແຕ່ຫຼົງເງົາໂຕ ແຕ່ງຕາທາແປ້ງ

ແຍງທາງຊ້າຍທາງຂວາ ມືຮ້ອຍຊ່ຳ

ບາດວ່າຕາຍມອດມ້ວຍ ໄດ້ໄປເກີດຢູ່ປ່າເຂົາ

ນັ່ງເຄົ້າເມົ້າເປັນນົກເຈົ່າ ຢູ່ຮິມໜອງ

ຕາຫາກມອງຫຼຽວຫາ ໝູ່ປາຊິວອ້າວ

ຂາຍາວໆ ຖົກໂທ້ຍ ກົ້ນໂນຍໆ ຂີ້ໂຜ່ນໆ

ຕາເຫຼືອຕົນສຸຊາດານ້ອງຫຼ້າ ຜູ້ທາແປ້ງແຕ່ງແຕ່ໂຕ

ກັບບ້ານໄວແທ້?

ລໍາສີທັນດອນ " ກອນສິບ "

ເປັນຫຍັງຟ້າວ ກັບບ້ານ ຫຼືຢ້ານຄູ່ ນາງຄອງ

ຫຼືນ້ອງມີ ຄົນຄອຍ ປ່ອຍໃຫ້ເຂົາ ເຫງົາຖ້າ

ຫຼືວ່າມີ ງານຫຍຸ້ງ ນຸງນັງ ຂັງກະຕ່າ

ອົດພໍຈາ ປາກຕ້ານ

ຂານບອກຄໍາ ໃຫ້ຮູ້ ກູນາອ້າຍ ແດ່ເດ!

ເຈົ້າຜູ້ຜົມ ເພໜ້າ ຜຍາລ່າຍ ຫຼາຍລາຍ

ນີ້ນໍ ຊາຍຄົນພອຍ ຊ່າງຖ່ອຍຈາ ຄໍາເກ້

ສັງໂລເລ ຫາເວົ້າ ຄົນຫູເບົາ ເວົ້າໃສ່

ແຟນຢູ່ໃສ ບໍ່ຮູ້

ຊູ້ຊິມາ ປາກຕ້ານ ປານນີ້ ບໍ່ຫ່ອນເຫັນ!

ເປັນໂທສທັນຕ໌ ແທ້ນ້ອງ ພຽງລອງຕ່ອຍ ຕາງຖາມ

ຢ່າຟ້າວທໍາ ທີມຶນ ຕື່ນໝາກຕູມ ໂຕນເຕັ້ນ

ເຫັນນ້ອງຢືນ ຊຶງເຊີ້ ລະເມີຫຼົງ ຊົງຫຼ່າ

ຢ່າຟ້າງຂົມ ຄຽດຮ້າຍ

ກາຍຊິແກ່ ກ່ອນເຖົ້າ ໂຕເຈົ້າ ຊິບໍ່ບານ!

ຢ່າມາທໍາ ທ່າເຍີ້ຍ ຫົວອະເຮີ່ຍ ເຫັນຫາງ

ນາງນີ້ນາມ ແນວຍິງ ສິ່ງບໍ່ມີ ຫາຕ້ານ

ໜ້າບໍ່ບານ ຕາມແຫຼ້ວ ແນວຄີງ ບໍ່ໄດ້ສ່ຽນ

ບໍ່ແມ່ນກວຽນ ແມ່ນລໍ້

ບໍ່ໜັກຄໍ ບ່າວອ້າຍ ໃຜຊິເວົ້າ ຊ່າງຕາມ

ຂໍໂທສນໍາ ນ້ອງຫຼ້າ ຢ່າຟ້າວດ່າ ຄໍາແຂງ

ຖ້າໄປແທງ ຈິຕໃຈ ໂປຣຖອະພັຍ ຂໍຢ້ໍາ

ຂອບໃຈນໍາ ເດີຫຼ້າ ຊານົມເຢັນ ມາສົ່ງ

ຮ້ານລໍາວົງ ບໍ່ແລ້ວ

ແກ້ວ ຊິປະປ່ອຍອ້າຍ ໃຫ້ຊາຍໂອ້ ອ່າວກະສັນຕ໌?

ເຈົ້າຜູ້ຄີງ ຂາວກ້າມ ງາມສງ່າ ສົມຊາຍ

ຂໍອະພັຍ ຮຽມອວນ ຊິດ່ວນໄກ ກັບບ້ານ

ຍັງມີງານ ຄາຄ້າງ ຕ້ອງສະສາງ ຊ່ວຍທ່ານ

ຍາລຸງຈານ ເພິ່ນໃຊ້

ດອກໄມ້ຂາຍ ບໍ່ແລ້ວ ນາງແກ້ວ ຊິຈາກຈຣ

ໃຫ້ໂຊຄດີ ເດີນ້ອງ ຊິຄອງຢູ່ ທາງຫຼັງ

ລໍຄອຍນາງ ກັບມາ ອ້າຍສັ່ງຈາ ສຽງອ້ອນ

ຄອນກະບຽນ ທັງເວົ້າ ເຮົາຂໍລາ ລົມກ່ອນ

ມືຂວາຊອນ ສ່ຽວຊ້ວນ

ຊວນຊຸ່ມສາວ ຊັກໃຊ້ ລາອ້າຍ ຊິຫ່າງຊາຍ

ພວກນ້ອງກັບ ໄປບ້ານ ເສັດງານຄ່ອຍ ຕິດຕາມ

ຮ້ານລໍາວົງ ເສັດສັບ ຊິຄ່ອຍກັບ ໄປຜ້າຍ

ໃຫ້ບອກ ບິດາເຈົ້າ ເຖົ້າມານດາ ກ້ໍາຝ່າຍ

ແລງຄ່ໍາລົງ ຄ່ອຍຍ້າຍ

ໄປຂາບຄຸນ ທ່ານທ້າວ ຊຽງເຫຼົາເວົ້າ ສົ່ງທາງ

ສອງສາວເດີນ ຜ່ານຊຸ້ມ ແກ້ວຖາມຊຸ່ມ ສຽງໃສ

ກາຍເຈ໊ກສົວ ຫຼືຍັງ ແມ່ສັ່ງຄໍາ ຄາຄ້າງ

ໃຫ້ນາງຫາ ເຫັນຊື້ ຂີ້ກົ່ວຖື ພໍ່ສັ່ງ

ສັງກະສີ ຮົ່ວຊອດ

ພໍຈອດຢາ ຊ່ວຍໄວ້ ຍາມຝົນໃກ້ ບໍ່ໄກ

ປະພັນທ໌ໂດຍ: ຂຽດຂາຄໍາ ທັມມະວົງສາ.